Siyam ka magtiayon ang opisyal nga gibugkos sa kaminyoon atol sa usa ka matahom nga civil wedding ceremony nga gipahigayon sa City Hall Rooftop niadtong nakalabay nga adlaw.
Gisaksihan sa ilang pamilya, higala ug pipila ka lokal nga opisyal ang panumpa sa ilang gugma nga puno sa emosyon ug kalipay. Ang kasal nagtimaan sa sinugdanan sa bag-ong yugto sa ilang kinabuhi diin ilang gihulagway ang panag-uban isip usa ka nagpalig-on nga pundasyon sa pamilya ug katilingban.
Matud sa pipila ka bag-ong kasal, ang maong seremonya usa ka damgo nga natuman ug usa ka timaan nga andam na sila nga atubangon ang responsibilidad nga dala sa panagtiayon. Ang uban misulti nga mas napalalom ang ilang pagsabot sa kahulugan sa gugma ug sakripisyo samtang nagsugod sila sa bag-ong panaw. Ang maong seremonya gipangulohan ni Mayor Josef Fortich Cagas isip officiating officer.
SOURCE: MJFC PROGRAMS AND PROJECTS
