Gipasalig sa Department of Energy (DOE) nga igo gihapon ang suplay sa kuryente sa nasod bisan pa sa kadaot nga dala sa Bagyong Opong (Bualoi). Sa report sa DOE, temporaryong gipasirado ang Units 1-3 sa BacMan Geothermal Power Plant sa Sorsogon ug Albay (133 MW), ingon man ang 28-MW Palayan Binary Plant sa Albay isip pag-amping.
Bisan pa, ang tanan nga uban pang on-grid nga mga planta sa kuryente nagpabilin nga naglihok. Sa off-grid nga mga lugar, pipila ka mga diesel power plant ubos sa Small Power Utilities Group (SPUG) sa Napocor ang limitado ang operasyon tungod sa epekto sa maong bagyo.
Gipakatap na ang mga restoration team ilabi na sa mga lugar sama sa Camiguin Island sa Cagayan. Gikataho usab sa National Grid Corporation of the Philippines (NGCP) nga ang usa sa unom ka apektadong transmission lines, ang Amlan-Siaton 69kV Line sa Negros Oriental, nabalik na sa operasyon, samtang lima pa ang padayon pang ginayo.
Ang DOE nagkanayon nga 87 ka electric cooperatives sa 52 ka probinsiya ang gimonitor, 16 ang nakasinati og partial interruptions ug 6 ang nakasinati og total blackouts – kasagaran sa Bicol, Eastern Visayas, ug Mimaropa.
Samtang, nagpabiling igo ang suplay sa lana sa tibuok nasod. Napulo ka gasolinahan ang temporaryong gisirad-an tungod sa pagbaha o pagkawala sa kuryente. Usa ka charging station sa Electric Vehicle sa La Union ang kasamtangang offline.
Photo courtesy to:PNA
