Misalmot ang kabatan-onang Caraganon ug pipila ka mga estudyante sa gihimong Anti-Corruption Rally niadtong Setyembre 21, 2025, aron ipakita ang ilang panaghiusa batok sa korapsiyon sa nasud.
Nagbitbit og mga placards ug banners ang mga partisipante samtang nagasinggit sa ilang panawagan alang sa hustong paggamit sa kaban sa bayan ug tarong nga serbisyo publiko.
Gibutyag sa mga kabatan-onan nga dili angay himoon nga negosyo ang serbisyo publiko ug gikinahanglan nga ang mga opisyal nga nalambigit sa kaso sa korapsyon manubag ug pahamtangan sa hustong silot.
Sa maong rally, gihagit usab sa kabatan-onan sa Caraga ang katawhan nga dili mahadlok sa pagbarog aron batokan ang daotang mga pamaagi sa gobyerno nga makadaot sa katawhan ug katilingban.
Ang kalihokan giapilan sa nagkadaiyang grupo sa estudyante, mga relihiyosong lider ug sektor gikan sa lain-laing barangay, isip usa ka pagpakita sa panaghiusa ug suporta sa kampanya kontra korapsyon.
Ang rally gihimo subay sa paghinumdom sa ika-53 ka tuig nga anibersaryo sa pagdeklara sa Martial Law.
Photo courtesy: CEA BluePrint
