Dako ang kalipay sa fans ni Elias Lintucan human mipabor ang korte kaniya ug sa iyang banda nga Elias J.TV. Gi-grant sa RTC Branch 17 sa Kidapawan City ang preliminary injunction nga ilang gipangayo batok sa ilang kanhi manager nga si Beverly Labadlabad niadtong Septyembre 15, 2025.
Gisang-at sa kampo ni Elias ang kaso kaniadtong Agosto 17, tungod sa alegasyon nga gipanghuraw ug wala giagi sa manager ang mga booking ug transaksyon sa banda.
Sumala pa sa abogado ni Elias nga si Atty. Israelito Torreon, ang kontrata nga ilang napirmahan kaniadto peke ug walay klaro, tungod kay wala sila gi-explainan ug tarong.
Base sa desisyon sa korte, samtang nagpadayon pa ang kaso, dili na gitugotan si Labadlabad nga manghilabot sa professional affairs ni Elias ug sa banda.
Sa hulagway nga gi-post human sa hearing, makita si Elias nga malipayong nakig-istorya sa iyang abogado timailhan nga usa kini ka sweet victory alang sa iyang showbiz career.
via: Atty. IsraelitoTorreon
