Gibutyag sa Department of Energy (DOE) nga kasamtangan kining nakigtambayayong sa Asian Development Bank (ADB) ug Department of Economy, Planning and Development (DEPDev) alang sa $250 million loan program nga nagtumong nga dasigon ang mga imbestor sa geothermal energy sa nasud.
Sa sidelines sa Economic Journalists Association of the Philippines (EJAP) Energy Forum, gibutyag ni DOE Undersecretary Mylene Capongcol nga ang Geothermal Resource Derisking Facility nagtumong nga kunhuran ang gasto sa pinaka-unang higayon sa geothermal exploration.
Pasabot niya nga abagahon sa gobyerno ang dili moubos sa 50% sa gasto sa exploration pinaagi sa utang nga mahimong grant o di na kinahanglang bayaran kung dili mahimong malampuson ang proyekto.
Tumong usab sa DOE nga masumite ang program proposal sa Investment Coordination Committee sa Department of Economy, Planning, and Development kun (DEPDev) karong tuiga aron ma-launch kini sa sunod nga tuig.
Dugang pa sa DOE, kinahanglan na nga palig-onon ang geothermal sector nga daw nabiyaan na sa solar ug wind energy.
Sa datos sa DOE, adunay 1,952 megawatts (MW) nga geothermal capacity ang nasud sa 2024, samtang aduna pay nahabilin nga potensyal nga 400 MW nga mahimong palambuon.
Photo courtesy of assistance.ph
