Tungod sa lig-on nga testimonya gikan mismo sa duha ka igsoon nga menor de edad nalutsan sa warrant of arrest ang ilang magulang nga lalaki isip gitudlong suspetsado sa pagpatay sa ilang ginikanan ug usa pa ka igsoong lalaki nga miresulta pagsikop sa kapulisan alas 11:00 sa buntag kagahapon Setyembre 12, 2025 didto sa Purok- 11 Managok Malaybalay City Bukidnon
Atol sa gihimong press conference gibutyag ni Provincial Police Director Lieutenant Colonel Jovit Culaway nga nakita niadtong higayona sa duha ka manghod nga babaye ilang kuya nga si John Kyler Anduhon sukwahi sa gisulti sa suspect kung asa mitakdo usab ang ilang nakuhang pisikal nga ebidensya ngadto sa gitug-an sa witness.
Dugang pa ni Culaway nga mismo ang mga iyaan ug uyoan sa suspect nga igsuon sa amahan niini maoy complainant batok ngadto kaniya.
Una nang nigawas sa imbestigasyon nga posibleng kaulaw maoy nagtukmod sa suspetsado paghimo sa krimen tungod niadtong panahona gipangandaman na sa iyang ginikanan ang iyang graduation apan nasuta nga dili kini makagraduate sa kursong Criminology sa tunghaan syudad Valencia tungod tuig 2023 pa lang miundang na kini.
Kahinumduman nga Mayo 21, 2025, brutal nga gipatay sa suspetsado ang inahan nga si Evangeline amahan nga si Jovane Anduhon ug 14 anyos nga igsuong lalaki nga si alyas Ivan.
Nag-atubang karon sa duha ka ihap nga kasong Parricide ug kasong murder nga walay pyansa ang nasangpit nga suspetsado kinsa nagtingkagol sa Malaybalay City Police Station samtang ang duha ka menor de edad anaa sa proteksyon ug kustodiya sa City Social Welfare and Development Office.
Nagpabilin karon ang suspetsado sa kustodiya sa Malaybalay City Police Station, samtang anaa sa proteksyon sa City Social Welfare and Development Office (CSWDO) ang duha ka menor de edad nga igsuon nga nagpamatuod sa insidente.
via: Malaybalay City PNP
