Lima ka mga tulunghaan sa syudad sa Pagadian ang gibisita sa Land Transportation Office (LTO) Pagadian District aron sa pag-edukar sa mga kabataan kabahin sa road safety ug compliance sa regulasyon sa balaod trapiko.
Matud ni LTO Pagadian District Office Chief Allan E. Macabangkit, pipila sa ilang nabisita mao ang Co Tek Chun National Trade School, Tawagan Sur National High School, Zamboanga del Sur National High School, Pagadian City Science High School, ug MSU Buug Campus.
Nalakip sa ilang katuyuan mao ang pagpasabot kabahin sa ilang hugot nga pagpanakop sa tanang magmaneho nga menor de edad, ang kakulangon sa kumpletong dokumento, ug balaod sa pagsuot ug helmet sa sentrong bahin sa syudad alang sa kaluwasan sa matag usa.
Gisubli ni Macabangit, hugot nga gipatuman sa LTO Region 9 ang maong mandato gumikan sa natala nga 234 ka mga aksidente nga nakasingle motor karong tuiga, diin buot sa LTO Region 9 nga kini makunhuran.
Gawas sa pagbisita sa nagkadaiyang mga tulunghaan, gihimo sab sa LTO Pagadian ang helmet testing programs ug mga specialized seminars alang sa mga drivers aron mapaabot alang sa tanan nga mga driver ang mga gikinahanglang mga pahibalo sa ilang buhatan.
