Gibutyag ni Ernie Libot, Officer-in-Charge sa Tambo Market sa Iligan City, nga ang kanunay’ng pagbaha sa merkado panahon sa ting-ulan resulta sa mga barado nga kanal tungod sa mga cellophane nga gilabay lang sa mga tawo.
Sa eksklusibong pakighinabi sa Juander Radyo News Team, giingon ni Libot nga ang mga basura nga gilabay sa drainage system ilabi na ang mga plastic cellophane, mao ang nag-unang hinungdan sa pag-overflow sa tubig sa merkado.
Nunot niini aron masulbad ang problema, padayon ang ilang regular nga inspeksyon sa palibot sa Tambo Market, aron masiguro nga limpyo ug walay nagbara sa mga kanal. Gidugang pa niya nga adunay monthly declogging operations nga gihimo ang Lokal nga Panggamhanan sa syudad aron malikayan ang padayon nga pagbaha ug masiguro nga normal ang awas sa tubig.
Samtang gipahimangnoan usab ang mga vendor ug mamalitay sa syudad, nga batunan ang kalimpyo sa palibot diin usa ka komon nga responsibilidad.
Matud pa ni Libot, kung magtinabangay ang tanan sa pagdisiplina ug sakto nga paglabay sa basura, masiguro ang limpyo, hapsay, ug komportableng palibot sa Tambo Market.
