Wala magpakahilom si Andi Eigenmann human gitawag og “madungis” sa pipila ka netizens ang duha niyang anak nga sila si Lilo ug Koa. Ang panaway migawas human iyang gi-upload ang video sa duha ka bata nga nagdala og backpack ug tumbler paingon sa eskuwelahan samtang nag-enjoy sa pagpunit og bulak.
Pinaagi sa iyang Instagram Story, nitubag si Andi sa mga komentong walay ayo. Iyang giingon nga mas ganahan siya nga ang iyang mga anak magpuyo sa gawas, malingaw ug aktibo, kaysa magsige lang og tutok sa gadgets, mokaon og fast food ug junk food, ug magtantrums kung dili masunod.
Matod pa niya, walay perpektong ginikanan apan mas importante nga ang mga bata malipay ug makasinati sa tinuod nga kinabuhi. Karon, nagpuyo sila ni Philmar Alipayo ug ilang pamilya sa isla sa Siargao.
Photo courtesy: Andi Eigenmann/X.com
