Nailhan na sa kabanay ang napalgan nga patay’ng lawas sa usa ka mananagat sa kadagatang bahin sa Barangay Ambulon, Vincenzo Sagun, Zamboanga del Sur, Septyembre 4, 2025.
Ang biktima nailhan sa alyas Jovanni, 22 anyos, ug residente sa Barangay Tambo, Alicia, Zamboanga Sibugay.
Gikataho nga niadto pang Septyembre 1, 2025 katapusan nga nakit -an ang biktima kuyog sa nagngalang Jimboy, nga lumulopyo sa Talusan, Zamboanga Sibugay aron mangisda gamit ang dinamita.
Apan aksidente matud pa nga nabuthan ilang pumpboat sa dinamita nga ilang dala hinungdan sa pagkamatay ni alyas Jovanni ug pagka-angol ni alyas Jimboy nga gidala sa Zamboanga City alang sa dinaliang pagtambal.
Ang patayng lawas sa biktima unang namatikdan sa usa ka mananagat sa lugar ug gi-rescue sa Vincenzo Sagun MPS, RHU, MDRRMO, ug Philippine Coast Guard.
Sa karon gikuha na sa kabanay ang patayng lawas sa biktima aron mapahimutang diha sa katapusang pahulayanan.
Photo for Illustration credits to:shutterstock
