Niadtong Mayo 2000, usa ka email nga adunay subject nga “ILOVEYOU” misulod sa inbox sa milyon-milyon ka tawo sa kalibutan.
Apan dili kini ordinaryong sulat-gugma diin kung ablihan ang attachment, dali kining mokaylap ug makapahinay sa email systems sa dagkong bangko, kompanya, ug bisan sa mga gobyerno.
Ang giilang ILOVEYOU virus, nga nagsugod gikan sa Pilipinas, usa sa labing makadaot nga cyberattack sa kasaysayan, tungod kay bag-o pa ang teknolohiya sa email ug daghang tawo ang na-curious sa “love letter,” daghang computer ang naapektuhan niini.
Sa pagsusi sa mga awtoridad, ilang natrace ang virus ngadto kang Onel de Guzman, usa ka estudyante sa computer science sa Manila.
Apan sa maong panahona, wala pay balaod sa Pilipinas batok cybercrime, busa wala siyay legal nga silot niini. Ang insidente giila karon nga usa ka turning point sa internet security.
Bisan kapin duha ka dekada na ang milabay, ang ILOVEYOU virus nagpabilin nga pahimangno: nga bisan ang pinakasimple nga pamaagi sa cyberspace mahimo’g makahatag ug dakong kadaot sa tibuok kalibutan.
Photo courtesy to: CNN
