Patay ang usa ka 26-anyos nga lalaki, nga nasayran nga naghunos sa kaugalingong kinabuhi, sa ilang panimalay sa Purok 4, Barangay Maniki, Kapalong, Davao del Norte niadtong nakalabay nga adlaw.
Base sa report sa Kapalong Municipal Police Station, nadawat nila ang taho gikan sa LGU Kapalong pasado alas 6:11 sa buntag kabahin sa gi-report nga insidente nga gihimo sa biktima nga giila nga si Denmark Salgado Amadeo, usa ka laborer, single, ug lumulupyo sa giingong lugar.
Sumala sa imbestigasyon, si Nelva Capote, usa ka silingan ug negosyanteng babaye, alas 5:30 sa buntag, iyang nakita ang biktima nga nagbitay na duol sa ilang CR gamit ang nylon nga pisi ug wala na’y kinabuhi.
Gisulti usab ni Luisito Amadeo Jr., igsoon sa biktima, nga ilang katapusan nga panagkita ni Denmark niadtong alas 9:00 sa gabii sa Agosto 31, 2025, diin nakitang nag-inusarang nag-inom og ilimnong makahubog ug misulti pa nga “naa siyay problema.”
Gidala pa ang lawas sa biktima sa Kapalong District Hospital, diin gideklarar nga dead on arrival sa attending physician.
Gikumpirma sa kapulisan nga wala’y timailhan sa foul play sa insidente ug gibalibaran na lamang sa pamilya ang pag-autopsy sa lawas sa maong biktima.
Photo for illustration credits to: istock
