Gisusi na karon sa Anti-Money Laundering Council sa mga ngalan sa pipila ka contractor nga nalambigit sa anomalosong flood control projects. Sumala ni Bangko Sentral Governor ug AMLC Chairman Eli Remolona, ginatan-aw sa konseho ang suspicious transaction reports gikan sa mga bangko, ug kung adunay ngalan nga mobarog, kini ila dayon susihon aron masuta ang kalabotan sa transaksyon.
Mas sayo niining buwana, gipadayag ni Presidente Ferdinand Marcos Jr. nga 15 ra ka contractor ang nakadaug sa 20 porsyento sa kapin 10,000 ka flood control projects sukad 2022. Tungod niini, nagmando ang Commission on Audit sa pagpatuman og in-person technical inspection sa tanang nagpadayon ug nahuman nga flood control projects sa Bulacan.
Gisugdan usab sa DBM, DICT ug uban pang ahensya ang Project DIME o dime.gov.ph, usa ka online tracker nga nagtugot sa publiko sa pag-monitor ug pag-evaluate sa tanang flood control ug uban pang infrastructure projects gamit ang satellite, drone ug geotagging. Pinaagi niini, makahatag usab og feedback ang katawhan aron mapalig-on ang kampanya sa administrasyon kontra ghost projects ug anomalya.
Photo courtesy to:alburo law
