Gisugdan na sa pagpamutol ang mga punuan sa Palmera nga anaa nahimutang sa Brgy. San Miguel, syudad sa Tagum, Agosto 29, 2025.
Gisaksihan sa Juander Radyo Tagum News Team ang gihimong tubag sa lokal nga panggamhanan kabahin sa hangyo sa pipila ka mga Tagumenyo kinsa nabalaka na sa seguridad nga monabigar sa mga kadalanan panahon nga kusog ang hangin o dunay ulan, sanglit pipila na ka mga motorista ang nadisgrasya human natagakan sa mga palwa sa maong palmera, diin nagresulta sa disgrasya ug kamatayon.
Gikumperma usab sa City Environment and Natural Resources Office (CENRO) nga gawas sa San Miguel nga mga palmera, pamutlon usab ang anaa sa Timog, Barangay Madaum.
Pulihan na matud pa ang mga punuan sa lahi na usab nga variety sa palm tree subay sa nakuhang impormasyon sa pakighinabi sa pipila ka mga kawani sa CENRO.
Kahinumduman nga mokabat na sa 15 ngadto 17 katuig ang gidugayon sa maong mga tanom diin maoy hinungdan nga naila ang dakbayan sa Tagum nga The Palm City of the Philippines gumikan sa liboang palmera nga makita sa mga nag-unang kadalanan sa syudad.
