Gi-aprobahan na sa unang pagbasa sa konseho ang ordinansa nga nagtumong sa pag-umento sa binulan nga allowance sa mga daycare workers sa Iligan City gikan sa ₱6,000 paingon sa ₱8,000 matag bulan.
Nag-amendar ang maong ordinansa sa Resolution Number 22834 ug karon giandam pa alang sa mas lawom nga paghisgot sa mga komitiba ug pagpaubos sa dugang deliberasyon sa konseho sa wala pa kini mahimong pinal.
Gilauman nga ang maong panukiduki makatabang sa pag-ila sa dakong papel sa mga daycare workers sa syudad ilabi na sa ilang pag-atiman ug edukasyon sa mga kabataan sa critical nga unang yugto sa ilang kinabuhi.
Gikonsidera nga ang paghatag ug umento usa ka simbolo sa pagpasidungog sa ilang serbisyo ug kabahin sa paningkamot sa lokal nga panggamhanan nga mapalambo ang panginabuhian sa mga frontliners sa edukasyon sa kabataan.
Gikan sa mga kabarangayan hangtod sa sentro sa syudad, ang mga daycare workers nagpabiling pundasyon sa maayong kaugmaon sa kabataan ug kini nga lakang gilangkuban og pagtan-aw sa ilang kahimtang nga dugay nang nanginahanglan og suporta.
Photo Courtesy to: laagan sa Iligan
