Gilantaw karon sa kapulisan sa syudad sa Tagum pinaagi ni OIC Chief of Police, PLtCol. Frederick E Deles, atol sa pakighinabi sa Juander Radyo Tagum News Team ang tulo ka anggulo nga posibleng makahatag og tubag sa nahitabong pagpamusil-patay sa usa ka giilang Albert Razonabe nga mas nailang si Boboy pasayan, didto sa Tagum Public Market.
Kahinumdoman nga gipusil-patay si Razonabe sa makadaghang higayon gamit ang usa ka 9mm nga pistola, diin narekober sa awtoridad ang 9 ka mga basiyo sa bala, sa crime scene niadtong adlawng Domingo, Agosto 24, 2025.
Gibutyag ni Deles nga bag-ohay pa lamang nakagawas gikan sa pagka-bilanggo ang biktima gumikan sa pagkalambigit niini sa ilegal nga droga, hinungdan nga posibleng drug-related ang usa sa gitumbok sa kapulisan.
Samtang gilantaw usab niini ang pagkalambigit sa love triangle sanglit daghan usab kini nahimong live-in partner, ug ang anggulong personal grudge gumikan gawas sa droga, naduhig usab kini sa uban pang mga kaso nga diin gisuta pa sa kapulisan ngadto sa korte aron makakuha og dugang impormasyon nga makatudlo sa posibleng hinungdan sa maong krimen.
Photo for Illustrarion credits to: istock
