Nanawagan si nanay Noemi Locero, 68 anyos ug residente sa Purok Orchids Matalam Cotabato kinsa nabiktima sa Ipo-ipo, kaniadtong Agosto 26, 2025 ngadto sa iyang mga kabanay sa laing lugar nga luwas ra matud pa ang iyang kahimtang.
Kahibaloang nakurat ang mga residente sa Matalam, Cotabato, sa kalit lang nga pagtungha sa Ipo-ipo pasado alas 4:00 sa hapon sa nahisgutang adlaw.
Base sa report sa Municipal Disaster Risk Reduction and Management Office, nagsugod kini human sa kusog nga ulan nga miigo sa Barangay Poblacion, Matalam ug paglabay sa pipila ka minuto, kalit nga mihuros ang kusog nga hangin nga miresulta sa pagkaguba sa mga balay ug pang lupad ang mga atop niini.
Gibutyag ni Mrs. Cyrill B. Fernandez ang administrative aid sa Municipal Disaster Risk Reduction and Management Office Matalam, Cotabato nga dali nila kini nga girespondihan ug nahatagan na og pasiunang tabang ang biktima.
Nahatagan na sa Barangay Matalam, si nanay Locero og yero ingon man lansang apan nanawagan gihapon kini og hinabang sanglit hangtod karon wala pa napaayo ang iyang panimalay nga naguba sa ipo-ipo.
