Misobra sa tres mil ka mga bakanteng trabaho ang gitanyag atol sa World Cafe of Opportunities sa TESDA Zamboanga del Sur nga gipahigayon sa Robinson Mall, Pagadian City, August 27,2025.
Kini alayon sa kasaulogan sa 31st Anniversary sa Technical Education and Skills Development Authority (TESDA) diin katambayayong nila ang nagkadaiyang ahensiya sa Gobyerno sama sa PESO Pagadian, DICT, DMW, DTI, DOLE ug Provincial Government.
Matud ni Engr. Joseph Isaias Quipot VI, Pagadian Peso Manager, adunay 15 ka mga Local Employer ang misalmot nga nagtanyag ug 256 nga job vacancies, 4 ka Oversees Recruitment Agency, nga nagtanyag sa 3, 674 job vacancies nga musumatotal sa 3,930 ka mga job opportunities.
Gikan sa maong ihap, dako ang kahigayonan sa mga job seeker nga maka-apply sa trabado sa pribadong kompanya ug trabaho abroad.
Samtang gi-awhag sa Tesda Zamboanga del Sur ug Peso Pagadian ang mga job seeker nga dili sayangon ang kahigayonan nga ilang gitanyag aron maka-angkon ug trabaho basi sa kahanas sa matag using aplikante.
