Gitulis ang usa ka gasolinahan sa Barangay Capungagan, Kapalong Probinsiya sa Davao del Norte, niadtong nakalabay nga adlaw.
Sumala sa Kapalong Municipal Police Station (MPS), ang insidente nahitabo sa Samurai Gas Station nga nahimutang sa Purok 3B sa nahisgotang barangay.
Giila ang biktima nga si Bon Vianca Sarfega, 28 anyos, residente sa Purok 2A, Bajada, Capungagan, nga nagtrabaho isip cashier ug pump attendant sa gas station.
Subay sa report sa kapulisan, samtang nag-atiman sa iyang duty, kalit nga mitungha ang usa ka lalaking wala mailhi, armado ug kalit nga gitionan og pusil ang nahisgutan. Human giatubang ang biktima ug gideklarahan og tulis.
Gihatag sa biktima ang halin nga nagkantidad og P20,000 og misibat gilayon ang suspetsado, gamit ang dala niya nga motorsiklo sa wala matino nga direksiyon.
Nagpadayon karon ang imbestigasyon samtang gipahigayon sa Kapalong PNP ang hot pursuit operation aron madakpan ang maong suspetsado.
