Patay ang usa ka 49-anyos nga babaye human gidunggab sa iyang live-in partner alas 3:20 sa kaadlawon, Agosto 25, 2025, sa Barangay San Andres, Kadingilan, Bukidnon.
Sumala sa imbestigasyon, ang Barangay Tanod sa San Andres maoy nagdala sa suspetsado, 39-anyos nga lalaki, ngadto sa Kadingilan Municipal Police Station (MPS) human misurender pagkahuman sa insidente.
Gidali pa pagdala ang biktma sa Bukidnon Provincial Hospital (BPH) sa Maramag, apan gideklarar kining dead on arrival sa doktor tungod sa nahiagoman nga daghang samad dinunggaban sa lain-laing parte sa iyang lawas.
Base sa inisyal nga imbestigasyon sa kapolisan nga ang biktima natulog pa sa iyang higdaanan sa dihang gipukaw sa suspetsado ug dayon gidunggab sa makadaghang higayon.
Nasayran nga nasuko ang suspetsado human makadungog sa tsismis nga ang iyang live-in partner adunay relasyon sa ilang silingan. Human sa insidente, misibat ang suspetsado apan misurender dayon sa barangay Tanod.
Sa karon anaa na sa kustodiya Kadingilan Municipal Police Station ang suspetsado kinsa mag-atubang sa kasong murder.
via: Kadingilan Municipal Police Station
