Boluntaryong mitahan ang usa ka Commanding Officer sa Communist Terrorist Group (CTG) nga sakop sa Platoon 2, Sub-Regional Sentro de Grabidad Westland (SRSDG-WL), Northeastern Mindanao Regional Committee (NEMRC), sa 36th Infantry Battalion (36IB) ubos sa 901st Infantry Brigade sa Barangay Puyat, Carmen, Surigao del Sur, niadtong Agosto 22, 2025. Kauban niini ang iyang igsuon nga miyembro usab sa grupo.
Sa ilang pagsurender, gibutyag sa duha ka rebelde ang lokasyon sa usa ka armas cache diin narekober ang duha ka high-powered firearms ug usa ka Improvised Explosive Device (IED). Giila ang mga misurender nga sila si Edmar Maca alyas “Renren”, Commanding Officer sa Platoon 2, ug ang iyang igsuon nga si Michael Maca alyas “Datu”, miyembro sa grupo. Sila personal nga mitahan ngadto kang Lt. Col. Joselito B. Ante, Commanding Officer sa 36IB.
Nasayran usab nga adunay dakong papel sa ilang pagsurender si Ivy Angeles alyas “Marga”, asawa ni Renren, nga kaniadto sakop usab sa CTG. Nasalbar kini ug natabangan sa 36IB human masamdan sa engkuwentro sa Lanuza niadtong Hunyo 25, 2025.
Sa pagkakaron anaa sila sa kustodiya sa 36IB sa Brgy. Puyat Livelihood Village, Carmen, Surigao del Sur, alang sa saktong dokumentasyon ug tabang.
Courtesy: 36IB Infantry Battalion
