Nailhan na ang patayng lawas nga nakaplagan sa Purok Mansanitas, Brgy. Saguing, Makilala, North Cotabato, buntag niadtong adlawng Biyernes, Agosto 22, 2025.
Sa report sa Makilala Municipal Police Station, giila ang biktima nga si Jhon Mark Cabanlas, anaa sa hustong edad, walay trabaho ug kanhing residente sa Madrid Street, Brgy. Poblacion, Kidapawan City.
Dugang pa, niadtong Enero 2020, nalambigit ang biktima sa insidente sa pagpanunggab nga nahitabo atubangan sa Marasigan Building, Brgy. Poblacion, Kidapawan City ug gipasakaan siya og kaso sa korte ug nakonbikto sa krimen nga Attempted Murder.
Subay niini, ang biktima nalambigit usab sa nagkalain-laing ilegal nga kalihukan sa Kidapawan City. Nasayran, nga ang biktima nagapuyo lamang sa balay sa iyang mga higala.
Padayon pa ang ginahimong imbestigasyon sa Makilala MPS may kalabutan sa naasoy nga insidente.
