Nagpaalim sulod sa balay tambalanan ang usa ka indibidwal human kini gitigbas pasado alas 6:49 sa buntag niadtong nakalabay nga adlaw sa Brgy. Dad. East dakbayan sa Gensan.
Giila ang biktima nga si Dante Flores Juiso, hamtong ang pangidaron ug residente sa Brgy. Conel sakop sa syudad. Samtang giila ang suspek nga si Alyas Jose, hamtong og residente sa naasoy’ng lugar.
Subay sa report sa kapulisan nga lulong matud pa sa ilimnong makahubog ang suspek og kalit kining nagmaoy atubangan sa karenderya sa igsoon sa biktima.
Kalit matod pang niduol ang suspek ngadto sa biktima og nanigbas apan nakalikay ang biktima og nakadagan, gigukod pa kini sa suspek samtang atol sa pagdagan napandol ang biktima rason nga natigbasan kini sa suspek sa dughan nga bahin sa lawas.
Atol sa pag responde sa kapulisan narekober sa posisyon sa suspek ang usa ka sundang. Sa pagkakaron nakakustodiya na ang suspek sa Police Station 1 alang sa tukmang disposisyon ug dugang legal nga proseso.
