Nakadawat og tawag ang Sta .Cruz MPS mga bandang alas 7:40 sa buntag sa Agosto 20, 2025, gikan sa 2nd company Darong Hotline ug nagreport nga adunay nadiskubrehan nga patayng lawas sa Purok Matatag, Brgy. Astorga Sta. Cruz, Davao del Sur.
Daling miresponde ang mga personahe sa Sta. Cruz MPS sa maong lugar aron susihon ang maong report. Subay sa inisyal nga imbestigasyon, ang mga biktima giila nga si Esterlita Fajardo Mahinay, babaye, 60 anyos, mag-uuma; ug si Avelino Pending Gabutero, lalaki, 58 anyos, mag-uuma, nga parehong residente sa nahisgutang lugar ug magka-live-in partner.
Sumala sa anak sa mga biktima mga alas 6:30 sa buntag sa maong petsa, miadto siya sa puy-anan sa iyang ginikanan aron dalhan sila og pagkaon.
Pag-abot niya, nakita niya ang iyang inahan, nga si Esterlita, nga naghigda sa salog. Gihikap niya kini apan nakamatikod siya nga wala na kini nagalihok. Pag sulod niya sa balay, nadiskubre niya nga kini wala nay kinabuhi ug naligo sa iyang kaugalingong dugo.
Tungod sa kakuyaw, siya midagan og mga 300 metros gilay-on sa lugar sa insidente aron mangayo og pakitabang.
Pipila ka minutos ang milabay, usa ka Barangay Tanod nakadiskubre sa lawas sa lalaki nga biktima, si Avelino Pending Gabutero, nga nahimutang mga 230 metros ang kalayo sa ilang balay, naligo usab sa dugo ug patay na.
Sa pagkakaron padayon pang gipanubayan sa mga otoridad, ang maong mangilngig nga insidente.
