Kasong paglapas sa RA 9165 o Comprehensive Dangerous Drugs Act of 2002 ang atubangon sa tulo ka drug suspect, human gikasa ang buy-bust operation sa Purok Bagong Sikat, Barangay Kalawag 2, Isulan, Sultan Kudarat, pasado alas 7 sa buntag kagahapong adlawa.
Sa report sa Isulan Municipal Police Station, ang mga suspek usa ka 30-anyos, ulitawo, self-employed, usa ka 34-anyos, ulitawo ug usa ka 40-anyos, minyo nga pulos residente sa Brgy. Kalawag 2 sa nahisgutang munisipyo.
Narekober sa mga otoridad ang unom ka sachet sa gitouhang shabu adunay gibana-banang kabug-atong 5grams nga nagkantidad og P34K, usa ka improvised tooter ug 1,000 pesos nga gigamit isip buy-bust money.
Samtang nakumpiska usab ang duha ka itom nga gagmayng pouch, duha ka bag ug usa ka grey Toyota Vios nga adunay plakang GAK 9043.
Sa karon, balhog na sa presohan ang mga suspek, samtang anaa na usab sa kamot sa mga otoridad ang mga nakuhang ebidensya alang sa dokumentasyon ug tukmang disposisyon.
