Patay ang duha ka security personnel sa inilang negosyante, human sa gikasang Search Warrant Implementation sa hiniusang pwersa sa Makilala MPS, 1st ug 2nd Provincial Mobile Force Company ug 1203rd Manuever Company sa RMFB12 sa Purok Gumasak, Barangay Bulakanon, Makilala, North Cotabato, kadlawon sa Huwebes Agosto 14, 2025.
Giila ang mga napatay nga sila Jovito Regidor Roa ug Paul Lacorte Pedroso nga matod pa miyembro sa militar base sa nakuha nga ID sa crime scene.
Sa taho, target sa operasyon ang inilang negosyante nga si Ramon Floresta, tungod sa bayolasyon sa RA 10591 o Comprehensive Firearms and Ammuniton Regulation Act.
Samtang paingon sa area ang mga otoridad, gipabuthan kini sa mga security personnel hinungdan nga nibalos usab ang mga kapulisan nga miresulta sa pagkamatay sa mga nahisgutan.
Nakuha sa balay sa negosyante ang Glock 23 pistol nga caliber .45, usa ka taas nga armas, usa ka COLT M16 Caliber 5.56mm, mga magazine ug mga bala sa calibre 40.
Sa karon, anaa na sa kamot sa otoridad ang mga nakuhang ebidensya alang sa dokumentasyon ug tukmang disposisyon, samtang nakakustodiya na sa Makilala MPS ang negosyante.
