TAGUM CITY- Mokabat sa 2,396 nga kaso sa leptospirosis ang natala sa Department of Health gikan Hunyo 8 o usa ka semana human gideklara sa PAGASA ang ting-ulan hangtod Agosto 7, 2025.
Nakaalerto ang mga hospital sa DOH sa nasud, kalabot niini ug nag-abre na ang pipila ka mga leptospirosis fast lanes aron sa mas paspas nga malantaw ang mga pasyenteng moabot nga magpakonsulta.
Andam matud pa ang ahensya sa gilaumang pagtaas sa kaso human sa nagsunod nga pagbaha nunot sa habagat, bagyong Crising, Dante, ug Emong.
Gibantayan usab sa ahensya ang mga kaso sa dengue nga miabot na sa 8,171 sukad Hulyo 6 hangtod Hulyo 19.
Mas ubos kini og 33% kumpara sa natala nga mga kaso sa ulahing semana sa Hunyo.
Pahimangno sa DOH nga batasanon ang pagbuhat sa 4Ts nga Taob, Taktak, Tuyo, ug Takip matag alas-4 sa hapon aron masugpo ang mga ginabalayan sa lamok labina karong nahuman na ang mga pag-ulan nga pwedeng dunay mga natapok nga tubig nga posibleng puy-an sa lamok.
