MATI CITY- Gipusil-patay ang Barangay Kagawad sa Calapagan, Lupon, Davao Oriental kagabii, Agosto 11, 2025, samtang nagpakaon kini sa iyang mga baboy sa Purok Quarry Fortune, Barangay Calapagan. Ang biktima giila nga si Joel Moyoco Lumikid, hingkod ug residente sa Purok Centro 1 sa maong barangay.
Base sa imbestigasyon sa Lupon Municipal Police Station, giduol ang biktima sa wala mailhing suspetsado ug gipusil kini makadaghang higayon, hinungdan sa pagka-igo sa lain-laing parte sa lawas. Gilayon kining gidala sa Davao Oriental Provincial Hospital ning syudad sa Mati apan gideklarar nga dead on arrival sa doktor.
Nakuha sa crime scene ang tulo ka basiyo sa bala nga gi-tuohang gigamit sa .45 caliber nga armas. Gipahigayon sa Davao Oriental Provincial Forensic Unit ang paraffin test sa biktima samtang sa laing bahin nagdumili ang pamilya nga ipa ilawon pa sa autopsy sa lawas sa biktima.
Sa interview sa kapulisan ngadto sa pamilya sa biktima, gipadayag nga ang gipasanginlang hinungdan sa insidente mao ang bangi sa yuta. Padayon pa ang imbestigasyon aron maila ug madakpan ang suspetsado nga midagan palayo human sa krimen.
