DIPOLOG CITY- Napalgan nga wala nay kinabuhi ang lawas sa 54 anyos nga lalaki sa suba sa Brgy. Dilawa, lungsod sa Piñan, Zamboanga del Norte, Agosto 10,2025. Giila ang biktima nga usa ka mag-uuma ug residente sa nasangpit nga barangay.
Matod pa sa taho sa Piñan MPS, nakadawat ug tawag ang buhatan gikan sa Brgy. Kapitan sa maong barangay kalabot na sa napalgang patayng lawas sa maong suba. Base sa inisyal nga imbestigasyon sa kapulisan, kapin kon kulang alas 5 sa hapon sa Agosto 9, ang biktima ang mipadulong sa suba sa may Purok Avocado sakop sa maong barangay aron sa pagkuha sa iyang gitugway nga kabaw tabok sa suba. Apan tungod sa kakusog sa agos sa tubig sa maong suba, gianod ang biktima.
Gipahigayon sa mga kabanay ug mga barangay officials ang search and rescue operation ug nianang kapin kon kulang alas 6 sa buntag kagahapon, napalgan na lamang nga wa nay kinabuhi ang biktima sa may suba sa purok nangka.
Gipahigayon usab ang postmortem examination sa patayng lawas sa biktima pinaagi sa mga personahe sa Rural Health Unit sa lungsod sa Piñan, ug gikumpirma nga drowning-induced asphyxia o pagkalumos ang hinungdan sa kamatayon niini ug walay foul play.
Ang patayng lawas sa biktima ang anaa na sa pamilya alang sa pagpahiluna.
Photo credits: Mira Gomez
