TAGUM CITY- Nagpahibalo ang Commission on Election kon COMELEC sa rehiyon onse, nga dili una sila mo-akomodar og mga local transfer nga mga kliyente atol sa Agosto 1 ngadto 10, 2025 nga registration period.
Gibutyag ni Atty. Gay Enumerables, COMELEC Region XI Spokesperson, nga prayoridad sa maong higayon mao ang mga magparehistro nga first time nga nagpangidaron og 15 anyos pataas.
Lakip usab sa ilang e-akomodar ang mga magpa-reactivate kon kadtong mga wala makabotar sa sunod-sunod nga duha ka higayon sa eleksyon ug na deactivate.
Ang mga botante usab nga overseas nga buot magpa-balhin gikan abroad, apil usab nga e-accomodate sa comelec.
Nag-awhag ang buhatan nga mobisita lamang sa mga venue sa matag lugar kung diin gipahigayon ang mga registration sa dili pa matapos ang gihatag nga deadline sa umaabot nga Agosto 10, 2025.
Samtang mihangyo usab si Enumerables nga sabton ang proseso aron malikayan ang kalibog sa katawhan.
Subay sa datos, nasayran nga gikan Agosto 1 ngadto 3 mokabat na sa 3,162 ang mga nakaparehistro sa probinsya sa Davao del Norte.
