KIDAPAWAN CITY- Duha ka kaso ang atubangon sa driver sa motorsikong si Carlos Dapan Guabong Jr, nga nibangga sa estudyanteng gi-rescue sa 911 Kidapawan lakip na ang duha ka rescuers sa Purok 5B, Brgy. Sudapin, Kidapawan City, kadlawon niadtong Agosto 3.
Kini ang gibutyag ni Kidapawan City Police Station Chief of Police PLTCOL Dominador Palgan Jr., kung asa moatubang og kasong reckless imprudence resulting to homicide ug reckless imprudence resulting to serious physical injury si Guabong.
Pagpaklaro sa hepe, nga ilang giapas ang filing sa reckless imprudence resulting to homicide nga kaso sa driver, samtang ang usa ka kaso mahulog kini sa regular filing tungod dili pa ma-interview sa fiscal ang biktimang rescuer tungod na usab sa iyang naka-schedule nga operasyon kagahapong adlawa.
Kahinumduman, naaksidente ang usa ka Froilan Panagsagan kauban ang angkas niining babaye tungod sa paglikay niini sa iro, apan samtang gina-rescue kini sa 911 Kidapawan, nabanggaan sa hubog nga si Guabong asa nagpahaguros og padagan sa iyang motorsiklo nga miresulta sa pagkaigo ni Panagsagan nga anaa sa stretcher lakip na ang duha ka rescuer.
Daling gidala sa mga balay tambalanan sa dakbayan ang mga biktima, apan gedeklarang patay si Panagsagan samtang ginapailawom sa medical treatment.
Panawagan sa hepe sa mga nanag-iya og iro nga ikulong kini aron dili makaperwisyo sa ubang tawo ug sa mga driver nga nakainom kung mamahimo dili na magmaneho sa motorsiklo o mas maayong mo-cummute nalang aron malikayan ang disgrasya.
