SURIGAO CITY- Patay on-the-spot ang duha ka mga kawani sa gobyerno nga gilangkuban sa usa ka casual nga personahe sa Land Transportation Office kon LTO ug usa ka myembro sa Criminal Investigation and Detection Group kon CIDG atol sa nahitabong pinusilay bandang alas 3:35 kaganinang kaadlawon sa may P-4, Brgy. Sta. Cruz, San Jose, Dinagat Islands.
Sa report nga nahipos sa Juander Radyo Surigao, naila ang biktima nga si Patrolman Ferry Sida Jaso, 29-anyos, minyo ug myembro sa CIDG-Dinagat Islands Provincial Field Unit, kasamtangang residente sa Mainit, Surigao del Norte.
Samtang ang suspek usa ka traffic enforcer sa lugar ug bag-ohay lang natransfer sa LTO Satellite Office sa Dinagat Islands gikan sa lokal nga pagamhanan sa San Jose isip enforcer usab nga si Anjun Casador, minyo, residente sa Sta. Cruz, San Jose, Dinagat Islands.
Sa report nga nakuha sa Juander Radyo gikan sa San Jose Municipal Police Station, nasayran nga nagpahigayon og surveillance ang CIDG batok kang Casador alang sa posible unta nga police operation sa lugar. Wala damha sa dihang niabot ang operating unit sa area, kalit lamang nibunot sa iyang armas ang suspek ug gipusil ang personahe sa CIDG nga si Patrolman Jaso igo sa ulo.
Sa dihang nakakita ang kaubanang myembro sa CIDG nga buddy sa bıktima, dali usab niya kining gipusil ang personahe sa LTO og pito (7) ka higayon kining naigo nga miresulta sa hinanaling kamatayon.
Giila ang kaubanang CIDG nga midepensa sa biktima nga si Pat Leonel Estroso, 31-anyos, minyo, ug parehong PNP member nga na-assigned sa CIDG, Dinagat islands Provincial Field Unit (DIPFU).
Kasamtangan karung gikustodiya sa San Jose Municipal Police Station si Estroso alang sa hustong disposasyon. Gipalawman na ang makuting imbestigasyon sa maong insidente.
