SURIGAO CITY- Sugdan na ang pagtukod sa bag-ong passenger terminal sa Siargao Airport karong Biyernes Agosto 8,2025. Kini nga proyekto usa ka tubag sa direktiba sa gobyerno nga himuong mas sayon ug nindot ang kasinatian sa mga turista, lokal man o langyaw, nga mogamit sa maong tugpahanan.
Sumala ni Transportation Secretary Vince Dizon, palapdan ang terminal aron malikayan ang kasikas ug mapalambo ang kaharuhay sa mga pasahero.
Gikan sa kasamtangang kapasidad nga 200 ka pasahero, ang bag-ong terminal makaserbisyo na og hangtod 750 ka pasahero kada adlaw.
Kabahin kini sa Public-Private Partnership (PPP) proposal alang sa modernisasyon sa mga tugpahanan sa tibuok nasud.
Gipadayag sa DOTr nga tungod kay giila ang Siargao isip usa sa mga top tourist destinations sa Pilipinas, angay nga hatagan kini og prayoridad sa mga imprastraktura nga kalambuan.
source: Ma. Kamilya Ysabel
