KIDAPAWAN CITY- Planado na ang mga aktibidad sa umaabot nga Timpupo Festival 2025 sa Kidapawan City, sugod Agosto 16 hangtod Agosto 27 ning kasamtangang tuig.
Sa gipagula nga mga aktibidad, pagasugdan sa usa ka Luntian Trail Ultra Marathon nga pagahimoon sa Agosto 16 hangtod 17 sa RC Martinez Farm and Garden Resort sa Brgy. Mua-an ug pagasundan kini og City Wide Clean-up Drive sa Agosto 17 hangtod 18, aron magpabiling hinlo ang dakbayan alang na usab sa pagpangandam sa naasoy nga kasaulogan.
Samtang, ubay-ubay usab nga mga aktibidad ang gilatag sugod Agosto 18 hangtod Agosto 27.
Highlight sa mga aktibidad mao ang Fruits Eating Contest ug Durian Eat All You Can nga magsugod sa Agosto 22 hangtod Agosto 25 sa Farmers Fruit Stalls.
Aduna usab mga sikat nga singer ang giimbitahan sa City Government sama sa Sweetnotes nga mutugtug sa Agosto 23 ug sikat nga mga banda sama sa Orange and Lemons ug Cueshe nga mukanta usab sa Agosto 24.
Dili usab mopaulahi ang gikahinam-hinaman sa tanan ang Fruits Eat All You Can sa Dalan sa Agosto 26, asa una ng gipagula sa City Agriculturist nga anaa sa 1.5kms ang katas-on sa prutas nga ilang gipreparar nga libreng matilawan sa mga Kidapaweños ug sa mga mobisita sa dakbayan.
Ipahigayon usab sa Agosto 27 ang Civic Military Parade ug mahuman kini sa Pyromusical Display nga ipahigayon sa Kidapawan City Pilot Elementary School Grounds.
source: Inside Kidapawan
