TAGUM CITY- Patay ang usa ka indibidwal samtang usa usab ang na-angol sa aksidente sa motorsiklo nga nahitabo sa Barangay Miranda, Babak District, Island Garden City of Samal, probinsya sa Davao del Norte,niadtong nakalabay nga adlaw.
Sumala pa, ang sakyanan nga nalambigit sa aksidente mao ang usa ka Gray/Yellow Yamaha motorsiklo nga gimaneho ni Jasper Alliere, 30 anyos, residente sa Purok 3, Barangay Kinawitnon, Babak District.
Kauban niya ang pasahero nga si Reynaldo Carangue, usa ka cook, nga lumulupyo usab sa samang lugar. Base sa inisyal nga imbestigasyon, gikan sa Barangay Tambo paingon sa Barangay Kinawitnon ang ilang biyahe.
Sa dihang naabot sa dapit sa nahitaboan, nabuhian sa drayber ang manibela sa motor ug naliko kini sa kilid sa kalsada nga walay aspalto.
Niresulta kini sa pagka-angol nilang duha. Napamatud-an sa imbestigasyon nga ang duha ka biktima posibleng hubog sa ilimnon atol sa hitabo, human masayran nga miapil sila sa usa ka drinking session.
Girespondehan gilayon sa mga personahe sa City Disaster Risk Reduction and Management Council kon CDRRMC ug gidala ang mga biktima ngadto sa PEEDO Davao del Norte Hospital – Samal Zone.
Pag-abot sa ospital, gideklarar nga patay ang usa sa mga naaksidente. Ang lisensya sa drayber gikumpiska samtang padayon ang imbestigasyon, ug ang motorsiklo naka-impound na sa estasyon sa kapulisan.
