TAGUM CITY-Nasukod ang kaandam ug kaabtik sa City Disaster Risk Reduction and Management Office kon CDRRMO ug mga Barangay DRRM Committees sa mga coastal barangays sa syudad sa Tagum, atol sa gipahigayon pre-emptive evacuation niadtong nakalabay nga adlaw.
Nahitabo kini human sa abiso sa Department of the Interior and Local Government kon DILG nga mag-andam ang mga lokal nga panggamhanan sa posibleng epekto sa tsunami human sa kusog nga linog nga nahitabo duol sa baybayon sa Russia.
Sa mando ni Tagum City Mayor Rey Uy, dali nga gipabakwit sa CDRRMO Tagum, uban sa mga BDRRMCs, ang mga lumulupyo sa coastal areas sa Busaon, Liboganon, Bincungan, San Isidro, ug Madaum ngadto sa mga luwas nga lugar.
Ang maong lakang usa ka preventive measure aron malikayan ang posibleng kadaot ug katalagman kung mosamot ang kadako sa mga balod nga una nang gi-report nga anaa lamang ubos sa usa ka metro ang gitas-on.
Kahinumduman nga niadtong Hulyo ning tuiga, nahimong pilot area ang Barangay Liboganon sa gipahigayon nga Nationwide Simultaneous Earthquake Drill kon NSED ug Tsunami Full-Scale Exercise nga gi-organisa sa Office of the Civil Defense Region XI ug LGU Tagum.
Tungod sa maong preparasyon, napamatud-an sa lokal nga panggamhanan ang ilang kaandam ug koordinasyon panahon sa emerhensiya.
Nakatabang sab kini sa pagpalapad sa kahibalo sa katawhan sa mga angay buhaton kung adunay kalamidad. Alang sa CDRRMO, dako ang natabang sa nasinati nga tsunami drill sa pagsabot sa katawhan sa importansya sa pagpaminaw ug pagtuman sa mga abiso sa ilang opisina.
Tungod sa kooperasyon sa lokal nga gobyerno ug sa mga residente, kumpiyansa ang CDRRMO nga mas mapalig-on pa ang resilience sa nasangpit nga syudad batok sa mga katalagman sa umaabot.
Photo credits: CDRRMO TAGUM
