TAGUM CITY- Nagtiyabaw ang usa ka inahan sa dihang igo na lamang kining nagsud-ong sa iyang 7 anyos nga anak nga wala nay kinabuhi human matud pa nalumos pasado alas-11 sa buntag niadtong nakalabay nga adlaw sa Philbanking Beach Resort, Brgy. Dumoy, Davao City.
Giila ang maong biktima nga si alyas”Dodong”, residente sa Prk. 2, Camansi, Toril, Davao City. Subay sa impormasyon nga gibutyag sa inahan niini nga si alyas “Gil”, nangaligo silang mag-inahan sa dihang kalit lang nahanaw sa iyang panan-aw ang anak.
Gilayon kining gipangita sa maong lugar ug napalgan nila kini sa kabatuhang bahin sa maong dagat ug gidala gilayon sa St. John Hospital sa Toril Davao City apan gideklara kining dead on arrival.
Nagpahimangno ang mga otoridad ngadto sa mga ginikanan nga kanunay bantayan ang mga anak sa higayong mangaligo sa kadagatan aron malikayan ang susamang insedente.
