Gipasalig sa Department of Agriculture (DA) nga padayon nga protektahan sa ahensya ang mga lokal nga produkto sa agrikultura sama sa bugas, mais, asukal, manok, isda, ug baboy sa nagpadayong negosasyon sa taripa tali sa Pilipinas ug Estados Unidos.
Matod ni DA Secretary Francisco Tiu Laurel Jr., sila si Secretary Frederick Go ug Trade Secretary Cristina Roque nihatag og gibug-aton nga ang kaayohan sa mga lokal nga mag-uuma ug mangingisda maoy nag-unang prayoridad sa Pilipinas.
Kini human sa pamahayag ni US President Donald Trump nga ang Pilipinas miuyon sa 19% nga taripa sa ilang exports bugti sa duty-free access sa mga produkto sa Amerika. Kahinumduman nga giklaro sa Malacañang nga wala pa’y pinal nga kasabotan bahin niini.
Ang DA midugang nga si Secretary Go mipasalig nga walay konsesyon nga makadaut sa lokal nga industriya ug nga bisan unsa nga kasabutan kinahanglang balanse tali sa pagpalapad sa merkado ug pagpanalipod sa panginabuhi sa mga Pilipino.so
source:Jhon flores
