TAGUM CITY-Patay ang usa ka 25-anyos nga construction worker, human aksidenteng nahulog sa lungag sa construction site sa taytayan sa Purok 2, Barangay Caliclic, Babak District, IGACOS Davao del Norte, alas 9:10 sa buntag niadtong nakalabay nga adlaw.
Giila ang biktima nga si Welmar Melicio Lagunsay, residente sa Purok Mindahilia, Esperanza, Sto. Tomas, sa nahisgutang probinsya.
Giingong nangandam na siya sa pagbubo og semento sa board pile sa usa ka taytayan nga gihimo sa China Road Bridge Company sa dihang kalit siyang nawad-an sa balanse ug natumba.
Sa report sa kapulisan nga gisaysay sa inahan sa biktima nga si Rosemarie Melicio Lagunsay, 47 anyos, nahitabo ang insidente samtang nagtrabaho sa dapit ang iyang anak.
Ang maong asoy gisuportahan ni Jesus Cablian, 54-anyos nga foreman ug residente sa Barangay Poblacion, Monkayo, Davao de Oro, kinsa anaa sa maong panghitabo.
Ang pagkahulog hinungdan matud pa nga nawad-an og panimuot ang biktima ug naka-angkon og samad sa nawong. Gidala dayon ang biktima sa tambalanan sa Samal Zone, Barangay Peñaplata, apan gideklarar nga dead on arrival sa attending physician.
Sa medical findings nasayran nga namatay si Lagunsay tungod sa Acute Respiratory Failure Type 1 secondary to Traumatic Brain Injury.
Samtang gipahiluna na usab ang iyang patay’ng sa usa ka Funeral Homes alang sa saktong disposasyon.
Photos: for Illustration purposes
