SURIGAO CITY- Dakpan ang usa ka high-value nga drug suspect sa kapulisan human nakuhaan og kapin ₱1 Million nga balor sa ilegal nga droga ug armas atol sa buy-bust operation kagahapon sa hapon, Hulyo 22, 2025 sa Purok-Anthurium, Espina Extension, Barangay Taft, Surigao City.
Ang maong operasyon gilusad sa Drug Enforcement Unit sa Surigao del Norte Provincial Police Office (SDNPPO) uban ang koordinasyon sa Surigao City Police Station, 1st SDN Provincial Mobile Force Company (PMFC), ug Philippine Drug Enforcement Agency – Region 13 (PDEA-13), isip kabahin sa padayon nga kampanya batok sa ilegal nga droga.
Matod ni Police Colonel Warren Dablo, Provincial Director sa SDNPPO, ang nadakpan giila nga si alyas “Bokbok,” 51 anyos, lalaki, walay trabaho, ug residente sa Barangay Taft, Surigao City.
Sa gihimong pagrekisa, narekober gikan sa suspek ang mosunod nga ebidensya: Upat (4) ka heat-sealed nga sachet nga adunay gituohang shabu nga motimbang og 150.19 gramos, nga nagkantidad og ₱1,021,292.00; Usa ka berde nga sling bag; Usa ka Realme cellphone box; Usa ka P1,000 nga marked money;Usa ka unit sa Norinco .45 caliber pistol; Usa ka magazine nga adunay unom (6) ka bala; Ug drug paraphernalia.
Nasayran usab nga si “Bokbok” nasikop na kaniadtong Pebrero 2022 tungod sa kalapasan sa Republic Act 9165 o ang Comprehensive Dangerous Drugs Act of 2002, apan gibuhian niadtong Marso 2025 pinaagi sa plea bargaining agreement.
Karon, mag-atubang siya og bag-ong kaso ilawom sa R.A. 9165, lakip ang illegal possession of dangerous drugs ug illegal possession of firearms and ammunition.
Ang dinakpan ug ang tanang nakumpiskang ebidensya anaa na karon sa kustodiya sa kapulisan alang sa tukmang dokumentasyon ug legal nga disposisyon.
ctto:SDNPPO
