DIPOLOG CITY- Patay ang usa ka Brgy. Kagawad sa Brgy. Galingon, lungsod sa Tampilisan, Zamboanga Del Norte human kining gipusil sa usa ka lalaki niadtong alas 5:20 sa kahapunon, Hulyo 20, 2025.
Sumala sa imbestigasyon sa kapulisan, padung sa pagpakaon sa iyang mga binuhing manok ang biktima dihang kalit kining gipusil igo sa iyang dughan sa wala mailhi nga suspetsado kinsa nagsul-ob sa denim blue nga jacket ug bonnet. Human sa hitabo, daling misibat ang suspetsado sakay sa motorsiklo padulong sa direksyon sa Naga, Zamboanga Sibugay.
Sa may alas 5:10 sa hapon, Hulyo 21, 2025, atol sa gipahigayon nga hot pursuit operation sa mga personahe sa Tampilisan MPS kauban ang 2nd ZNPMFC, ug ZNPIU sa Barangay Tubod, Tampilisan nasikop ang suspetsado nga 61 anyos, residente sa Brgy. Medallo, Sapangdalaga, Misamis Occidental.
Matod pa nga misulay pa unta sa pagsukol ang suspetsado ug gipabuthan ang mga operating teams hinungdan sa pagbalos ug naigo ang suspek sa iyang tuo nga abaga. Dali usab kini nga gidala sa Tampilisan RHU alang sa medical nga atensyon.
Nasakmit gikan sa suspetsado ang armas nga M14 rifle nga walay serial number, tulo ka magazine, ug 32 ka buhing bala.
Padayon ang imbestigasyon ug pag-andam sa mga dokumento aron masang-at ang kasong kriminal batok sa suspetsado sa piskalya. Gipasalig usab sa kapulisan ang ilang paningkamot sa pagpanalipod sa kalinaw ug seguridad sa probinsya.
