SURIGAO CITY- Hugtanon nga gikondena ni Willy Ebangelio, Press Club Surigao Sur Chapter ang kamatayon sa usa ka Broadcaster sakay sa iyang motorsiklo, alas 7:00 sa buntag, Hulyo 21, 2025, sa Bosco, Mangagoy, Bislig City. Naila ang biktima nga si Erwin “Boy Pana” Segovia, broadcaster, nagdala sa programa nga ‘DIRETSAHAN NI BOY PANA SEGOVIA’ sa maong lugar.
Sa pahayag ni Willy Ebangelio iyang gibutyag nga usa ka hulga sa mga media practioner ang nahitabong pagpamusil sa tigbalita. Sa pagkakaron, padayon pang gi-imbestigahan ug gi-suta sa Bislig City Police Station ang motibo sa maong insidente.
Kahibaloan nga si Erwin Segovia naila nga alyas Boy Pana usa ka beteranong radio commentator ug broadcaster. Madomdoman nga napusilan na usab si Boy Pana 19 na ka tuig ang milabay sa may Strella, Mangagoy, apan naluwas ug gidala sa Kiamba, Sarangani Province.
Samtang nagpadayon sa pagpanibya didto sa Radyo Natin Kiamba. Pagkahuman, mibalhin siya sa Magic love FM sa Trento ug sa ulahi mibalik sa Mangagoy, diin siya nagpadayon sa pagpanibya gihapon sa radyo.
Tuig 2017, napatay usab ang broadcaster nga naila nga si Chris Iban Lozada sa PRIME FM nakabase gihapon sa Bislig City. Kahibaloan nga pauli na ang biktima gikan sa istasyunan sa dihang nahitabo kini.
