DIGOS CITY- Gipahigayon ang pormal nga turn-over ceremony sa bag-ong Digos City Dawis Multi-Purpose Building isip opisyal nga pagsugod sa kasadya sa Padigosan Festival 2025.
Gipangulohan ang seremonya sa pagpangbendisyon ug cutting of ribbon ni Congressman Jhon Tracy Cagas kinsa maoy nanguna sa pagpatuman ug pagdumala sa maong proyekto alang sa kaayohan sa mga Digoseño.
Kauban usab niya sa maong panagtigom si Mayor Josef Cagas,uban ang mga sakop sa Sangguniang Panlungsod, mga opisyal sa Barangay Dawis ug katawhang misalmot aron masaksihan ang maong mahinungdanong kalamboan sa komunidad.
Gilauman nga ang maong multi-purpose building mahimong sentro sa mga sports events, cultural programs, trainings, ug ubang pang mga kalihukan nga naghatag og oportunidad ug kabag-ohan sa lokal nga komunidad.
Kini nga proyekto nagpakita sa padayon nga paningkamot sa lokal nga liderato sa pagpalambo sa mga pasilidad sa siyudad ilabina sa mga lugar nga dunay potensyal sa pag-host sa dagkong kalihukan ug aktibidad.
Ang turnover ceremony usab ang usa sa mga highlight sa unang adlaw sa Padigosan Festival nga magpadayon hangtod Hulyo 19, 2025.
Nagpunting ang maong selebrasyon sa kultura, panaghiusa ug kasadya sa mga lumulupyo sa Digos, ilawom sa tema nga nagpasabot sa kalambuan ug pagkahiusa sa lokal nga pangagamhanan ug katawhan.
