DIGOS CITY- Patay ang usa ka patrolwoman, human naigo sa iyang kaugalingon nga aramas, naila ang biktima nga si Kay Remando Dumasig, 28 anyos, dedikado nga miyembro sa Matanao Municipal Police Station, nahitabo ang insidente mga alas 6:50 sa gabii niadtong Hulyo 11, 2025, sulod sa Female Quarter sa Matanao MPS,Purok Tahimik, Brgy Poblacion, Matanao, Davao del Sur.
Sa inisyal nga imbestigasyon nasayran nga si Pat. Dumasig nag-andam sa iyang giisyu nga service firearm, nga usa ka 9mm Girsan pistol nga adunay Serial No. T6368-22CK03370 alang sa gipa-abot nga ipahigayong buy-bust operation.
Samtang nagkarga sa iyang armas, nahulog kini ug sa instinct iya kining gisuwayan sa pagsalo apan aksidenteng nagunitan niini ang gatilyo sa armas hinungdan nga nibuto kini og niresulta sa pagkaigo sa iyang ulo. Daling gidala ang biktima sa MCDC Hospital sa Digos City, aron maluwas pa kini, apan gideklara kining dead on arrival sa mga medical team nga miatiman kaniya.
Sa pikas nga bahin, gihangyo ang Scene of the Crime Operatives (SOCO) nga mohimo og makuting imbestigasyon sa insidente. Ang narekober nga service firearm anaa na sa tukmang kustodiya isip kabahin sa nagpadayong imbestigasyon.
Samtang dako ang kasubo sa Davao del Sur Police Provincial Office sa wala damhang pagkamatay sa maong Patrolwoman, og ang buhatan magpadayon sa paghatag sa tanang gikinahanglang suporta ug tabang sa pamilya ni Pat. Dumasig ug gisiguro nga masunod ang saktong protocol ug imbestigasyon.
