SURIGAO CITY- Nakadawat og kopya ang probinsyal nga panggamhanan sa Surigao del Norte mahitungod na sa gipagawas nga resolusyon sa ombudsman diin napamatud-an nga adunay probable cause batok kang kanhi Gobernador Francisco Tinio Matugas ug kanhi Officer-in-Charge sa Provincial Budget Office Ma. Myrla S. Padayhag sa kaso nga may kalabutan sa Illegal Use of Public Funds or Property, nga nasuta nga naglambigit sa pagbalhin sa pondo nga nagkantidad og Php60,000,000.00 ngadto sa Department of Education – Surigao del Norte ug Siargao Divisions.
Ang reklamo giduso ni Oscar M. Pospia, Jr., nga gilangkuban sa pagpanglapas sa:
-Sections 3 (e) ug (g) sa Republic Act No. 3019 (Anti-Graft and Corrupt Practices Act),
-Republic Act No. 7080 (An Act Defining and Penalizing the Crime of Plunder),
-Republic Act No. 9184 (Government Procurement Reform Act) ug;
-Article 220 sa Revised Penal Code (Illegal Use of Public Funds or Property).
Sumala sa resolusyon nga gipagula sa opisina sa Ombudsman, nakita nga adunay igo nga basihan aron pasakaan og kaso ang duha ka respondents tungod sa iligal nga paggamit sa pondo sa Probinsya sa Surigao del Norte nga gibalhin ngadto sa DepEd divisions.
Gisugo sa korte ang pagpasaka og kaso batok kanila sa hustong hukmanan. Samtang ang ubang reklamo batok sa mga respondents gipangbasura tungod sa kakulang sa basihan.
Ang maong resolusyon, gipetsahan niadtong Marso 22, 2024 ug gipirmahan ni Eunice M. Sta. Maria-Manahan, Graft Investigation and Prosecution Officer II ug gi-review ni Ruth Laura A. Mella , Acting Director, PIAB-F.
Gipaningkamutan pa usab karun sa Juander Radyo Newsteam nga makuha ang habig sa kampo sa kanhi Gobernador ug kasamtangan nga Congressman sa Distrito 1 sa nahisgotang probinsya.
