IPIL- Nasakmit sa mga awtoridad ang kapin sa ₱563,000 nga kantidad sa smuggled nga sigarilyo atol sa usa ka operasyon batok smuggling sa Barangay Veterans Village, lungsod sa Ipil, Zamboanga Sibugay.
Gipasiugdahan ang operasyon sa Provincial Intelligence Unit (PIU) sa Zamboanga Sibugay Police Provincial Office (ZSBPPO), kauban ang Regional Intelligence Division-9 (RID-9) Regional Action Office alang sa Zamboanga Sibugay ug Ipil Municipal Police Station (Ipil MPS).
Naaresto sa maong operasyon ang usa ka 40-anyos nga lalaki nga giingong responsable sa pagpangpuslit sa kontrabando. Lakip sa narekober sa operasyon ang usa ka yunit sa Bajaj RE nga traysikol ug napulo ka master case nga naglangkob sa nagkalain-laing brand sa sigarilyo. Gibanabana nga mokabat sa ₱563,000 ang kantidad sa mga nakumpiskar nga sigarilyo.
Sa pikas nga bahin, matod ni Police Colonel Barnard Danie Dasugo, provincial director sa ZSBPPO, ang operasyon nagpamatuod sa ilang paningkamot nga mapugngan ang pagpangsmuggle nga makadaut sa lokal nga ekonomiya ug maghatag og hagit sa kalinaw ug kaluwasan.
Gidayeg usab ni Col. Dasugo ang mga operatiba ug nanawagan sa publiko nga magtinabangay pinaagi sa pagbantay sa ilang palibot ug pagsumbong dayon sa mga kadudahang kalihokan.
Gipasabot usab niya nga palig-onon pa sa kapulisan sa Zamboanga Sibugay ang mga kalihokan batok sa pagpangsmuggle ug krimen isip suporta sa kampanya sa Police Regional Office-9 (PRO-9) sa pagpanalipod sa katawhan ug pagmintinar sa kalinaw sa rehiyon.
Sa pagkakaron ang suspek ug ang mga ebidensiyang nakumpiska anaa na sa kustodiya sa Ipil MPS, samtang giandam na ang pagsaka sa tukmang mga kaso batok sa suspetsado.
