KIDAPAWAN CITY- Nagpahigayon og panagtigom ang Cotabato Province Culture and Arts Council, didto sa MuseyoKutawato, Amas, Kidapawan City. Tumong sa maong panagtigom ang pagtuki sa mga mahinungdanong sugyot aron mas mapalapad ug mapalambo ang sektor sa sining ug kultura sa probinsya sa Cotabato.
Lakip sa mga plano nga gihisgutan mao ang mga kalihokan alang sa katapusang duha ka quarters karong tuiga. Usa sa mga giuyonan sa konseho mao ang paghimo og pagtimbang sa pagpatuman sa programa nga gitawag og School of Living Tradition (SLT).
Tumong niini nga assessment mao ang pagpalambo sa programa pinaagi sa lig-on nga kooperasyon sa lokal nga gobyerno ug ubang ahensya nga mahimong kaabag sa pagpatuman niini.
Nitambong sa maong miting ang mga miyembro sa konseho sama nila IPMR/Ex-Officio Board Member Arsenio Ampalid, PPMC Chair ug kanhing USM President Francisco Gil N. Garcia, DepEd Education Program Supervisor Lito Fernandez, ug uban pa.
Nagpadayag ang konseho sa ilang lig-on nga pasalig sa padayon nga pagsuporta sa kultura ug kasaysayan sa Cotabato pinaagi sa mga inisyatiba nga makatabang sa tanang sektor sa katilingban.
