PAGADIAN CITY- Β Patay ang duha ka indibidwal human mahulog sa pangpang nga bahin ang sa usa ka Bus sa Purok 4, Mahayahay, Dumingag, Zamboanga del Sur, Hulyo 10, 2025. Kini subay sa gipagula nga datos sa Dumingag Municipal Rural Health Unit atol sa pagkighinabi sa Juander Radyo News Team sa mismong Municipal Health Officer.
Usa sa nakabsan sa kinabuhi giilang si Roy Bermudez, ROTC student, samtang wala pa gihinganlan ang laing usa nga nakabsan sa kinabuhi gumikan sa kakulang sa identipikasyon.
Mokabat sa 25 ka mga biktima ang nalambigit sa aksidente kadaghanan ROTC students, kinsa ang daling gipangdala sa Dumingag Rural Health Unit ug lima niini ang naka-angkon ug grabeng mga samad nga dali usab gi-refer ngadto sa nagkadaiyang balay tambalanan.
Base sa saysay ni Col.Patricio Tomales, Commander sa 9RCDG, kasagaran sakay sa maong Bus mga studyante sa St. Joseph College gikan sa Sindangan, Zamboanga del Norte ug pabalik na unta kini sa Kuta Dao aron humanon ang nasugdan niining Summer Training Camp aron mahingpit nga officer sa ROTC apan misangpot sa ngilngig nga panghitabo.
Dungan niini, gipaabot usab ni Dumingag Mayor Gerry Paglinawan iyang pahasubo ngadto sa mga pamilya sa biktima nga nakabsan sa kinabuhi ug gidayeg ang dinaliang pagresponde sa mga medical staff gikan sa RHU Dumingag.
Samtang luwas ra ang drayber sa maong sakyanan ug nakakustudiya na karon sa Dumingag Municipal Police Station nga gikatakda nang ipailawom sa inquest proceedings.
