TAGUM CITY- Patay nang napalgan ang usa ka 18 anyos nga dalaga human giatake ug giluba sa makadaghan nga higayon, sa mga wala mailhing suspek sa Brgy. La Filipina, Tagum City, Davao del Norte buntag sa Hulyo 9, 2025.
Naila ang biktima nga si alyas Sophie, 18 anyos, nagpuyo sa Purok 3A, Brgy. La Filipina sa nahisgotang syudad, usa ka estudyante sa University of the Philippines, kinsa nag inusara lamang kini sa iyang kwarto samtang sa pikas nga kwarto usab ang iyang mga ginikanan.
Gibutyag ni Tagum PNP OIC – PLtCol Frederick Deles nga nakahiagom og mga 20 ka mga samad dinunggaban ang maong biktima sa nagkadaiyang parte sa lawas niini nga usa sa posibleng hinungdan sa iyang hinanaling kamatayon. Nagtuo ang pamilya nga tulis ang hinungdan sa maong krimen gumikan nawala ang pipila sa mga personal nga gamit niini lakip ang iyang tablet, ug atm cards.
Sa gihimong pagsubay adunay nakita sa CCTV camera nga tulo ka mga lalaki nga migawas sa maong pinuy-anan. Samtang nahipos sa crime scene ang usa ka dumbbell, sundang ug cutter nga matod pa maoy gigamit sa pagpatay sa biktima.
Mas gipalawman pa karon sa kapulisan ang gihimong imbistigasyon alang sa hinanaling pagsulbad sa maong mangilngig ug brutal nga krimen.
