PAGADIAN CITY- Mokabat sa kinse ka mga pakete sa drogang shabu ang nakumpiska sa kapulisan gikan sa duha ka drug suspect dungan sa gilusad nga drug buy-bust operation sa Purok Palmera, Barangay Balangasan, Pagadian City, Hulyo 9, 2025.
Naila ang suspek sa alyas nga Lex, SLI, 25 anyos, ulitawo, walay trabaho ug residente sa Purok Makabibihag, Brgy. Sta. Lucia; ug si alyas Ram, kanhi nang dinakpan, 37 anyos, minyo, construction worker, ug residente sa Purok Sandayong, Sto Niño, Pagadian City.
Lakip sa nakumpiska sa operasyon ang usa ka 500 peso bill, duha ka unit nga android cellular phone infinix ug redmi color silver ug skyblue ug uban pang mga non drug paraphernalia. Ang mga nakuhang ebidensyang druga gibana-banang adunay gibug-aton nga 4 ka gramos nga nagkantidad og P27,200.00.
Sa pagkakaron ang nakuha nga mga butang giturn-over na sa Zamboanga del Sur Provincial Forensic Unit, Camp Abelon, Pagadian City alang sa laboratory examination. Samtang ang duha ka mga suspetsado nakustudiya na sa Pagadian City Police Station diin gi-andam na ang kasong may kalabutan sa Comprehensive Dangerous Drugs Act of 2002 (RA 9165).
